Məkkənin fəthi
Peyğəmbərimiz (s) Mədinədə gördüyü yuxusunda möminlərin
əmin-amanlıqla Məscidül-hərama daxil olmalarını və Kəbəni
təvaf etmələrini görmüş və möminləri bu xəbərlə müjdələmişdi.
Çünki Məkkədən Mədinəyə hicrət edən möminlər o gündən bəri
Məkkəyə gedə bilmirdilər.
Allah Peyğəmbərimizə (s) Öz dərgahından bir kömək və yardım
olaraq "Fəth" surəsinin 27-ci ayəsini vəhy edib və onun
röyasının həqiqət olduğunu, əgər Allah istəsə, möminlərin
Məkkəyə daxil olacaqlarını bildirmişdir. Həqiqətən də bir
müddət sonra, əvvəlcə Hudeybiyyə müqaviləsi, onun ardınca
isə Məkkənin fəthi ilə müsəlmanlar, eynilə ayədə
bildirildiyi kimi, əmin-amanlıqla Məscidül-hərama daxil
olublar. Beləliklə, Allah Peyğəmbərimizə (s) ilham etdiyi
müjdənin həqiqət olduğunu göstərmişdir.
Buxari Məkkənin fəth edilməsi haqqında İbni Abbasın belə
dediyini rəvayət edir:
İbni Abbas: "Quranı (oxumağı və təbliğ etməyi yaxud
hökmlərinə əməl etməyi) sənə vacib buyuran Allah qayıdacağın
yerə səni yenə də qaytaracaqdır..." ("Qəsəs" surəsi, 85)
mənasındakı ayədə ifadə edilən qaytarılacaq yerin Məkkə
olduğunu söyləyərdi".
Ancaq burada diqqəti çəkən başqa bir mühüm cəhət də var. "Fəth"
surəsinin 27-ci ayəsinə diqqət yetirsək, Məkkənin fəth
edilməsindən əvvəl gerçəkləşəcək başqa bir fəthdən də bəhs
edildiyi məlum olacaq. Həmçinin ayədə xəbər verildiyi kimi,
müsəlmanlar əvvəlcə yəhudilərin əlində olan Xeybər qalasını
fəth edib, sonra da Məkkəyə daxil olublar. "Fəth" surəsinin
27-ci ayəsi məşhur "Cəlaleyin" təfsirində belə izah edilir:
And olsun ki, Allah Peyğəmbərinə(s) həmin yuxunu doğru
göstərdi. Rəsulullah (s) Hudeybiyyə müqaviləsi bağlanan il
səfərə çıxmamışdan əvvəl yuxusunda özünün də, səhabələrinin
də əmin-amanlıq içində, saçlarını kəsdirərək Məkkəyə
girdiklərini görmüş və bunu da səhabələrinə xəbər vermişdi.
Onlar da sevinmişdilər. Yanındakı səhabələrlə birlikdə
çıxdılar. Kafirlər Hudeybiyyə adlanan yerdə qarşılarına
çıxıb onları Məkkəyə getməyə qoymayanda bu, müsəlmanlara çox
ağır gəldi. Bəzi münafiqlər isə şübhələnməyə başladılar. Bu
ayə həmin vaxt nazil oldu. "And olsun ki, Uca Allah öz
Peyğəmbərinin röyasının çin olduğunu təsdiq etdi. Əgər Allah
istəsə, siz əmin-amanlıqla, saçlarınızı qırxdırmış,
qısaltmış halda və qorxmadan Məscidül-hərama daxil
olacaqsınız. Allah sizin bilmədiklərinizi bilir. O, bundan
əlavə tezliklə bir qələbə də bəxş edəcəkdir". Bu da Xeybərin
fəth edilməsi idi. Və yuxu ertəsi il reallaşdı.
Peyğəmbərimiz (s) hicrətin 8-ci ilində Məkkəyə daxil olaraq
bu şəhəri fəth edib. Peyğəmbərimiz (s) möminlərə bu
müjdələri verəndə mövcud vəziyyət heç də istənilən səviyyədə
deyildi. Hətta mövcud şərait deyilənlərin tam əksini
göstərirdi, müşriklər möminləri Məkkəyə girməyə əsla
qoymayacaqlarında israr edirdilər. Bu isə qəlbində xəstəlik
olanların Peyğəmbərimizin (s) dediklərinə şübhə ilə
yanaşmasına səbəb olmuşdu. Ancaq Peyğəmbərimiz (s) Allaha
etibar edərək və insanların nə deyəcəyinə əhəmiyyət
verməyərək Allahın ona bildirdiyinə iman gətirmiş və bunu
insanlara açıqlamışdır. Rəbbimizin Peyğəmbərimizə (s)
verdiyi bu qeyb xəbərinin həyata keçməsi isə milyonlarla
insanın şahid olduğu çox böyük bir möcüzədir.